សភា​នឹង​ប្រជុំ​ដក​អភ័យ​ឯកសិទ្ធិ​លោក​ កឹម សុខា

ប្រភព ៖ ភ្នំពេញបុស្តិ៍

រដ្ឋសភា​នឹង​ប្រជុំ​សម្រេច​លើ​ករណី​ដក​អភ័យ​ឯកសិទ្ធិ​សភា​របស់​លោក កឹម សុខា ក្នុង​ពេល​ឆាប់ៗ​នេះ បន្ទាប់ពី​តុលាការ​បាន​សម្រេច​ធ្វើការ​ចោទប្រកាន់​ជា​ផ្លូវការ​ទៅ​លើ​ប្រធាន​គណបក្ស​ប្រឆាំង​រូប​នេះ​ពី​បទ ​«​ក្បត់ជាតិ​» ខណៈ​ដែល​មាន​ការ​ផ្សព្វផ្សាយ​ថា​មន្ត្រី​ជាន់​ខ្ពស់​គណបក្ស​សង្គ្រោះ​ជាតិ​ចំនួន​ ៦ ​រូប​ផ្សេង​ទៀត​អាច​នឹង​ត្រូវ​ចាប់​ខ្លួន​ដោយសារ​មាន​ការ​ពាក់ព័ន្ធ​នឹង​ករណី​លោក

កឹម សុខា ឬ​ពាក់ព័ន្ធ​ជាមួយ CIA របស់​អាមេរិក​។

លោក លី សុផាណា អ្នក​នាំពាក្យ​សាលា​ដំបូង​រាជធានី​ភ្នំពេញ​បាន​ឲ្យ​ដឹង​ថា ព្រះរាជអាជ្ញា​នៃ​សាលា​ដំបូង​រាជធានី​កាលពី​ព្រឹក​ម្សិលមិញ​បាន​ចោទប្រកាន់​លោក កឹម សុខា ប្រធាន​គណបក្ស​សង្គ្រោះ​ជាតិ​ជា​ផ្លូវការ​ហើយ​ពី​បទ «​សន្ទិដ្ឋិភាព​ជាមួយ​បរទេស​» តាម​មាត្រា​ ៤៤៣ ​នៃ​ក្រម​ព្រហ្មទណ្ឌ​ដែល​បទ​ចោទ​នេះ​ស្ថិត​ក្រោម​ផ្នែក​នៃ​អំពើ​ក្បត់ជាតិ និង​ចារកម្ម​ដែល​ប្រឈមមុខ​ជាប់​ពន្ធនាគារ​ពី​ ១៥ ​ទៅ​ ៣០ ​ឆ្នាំ​។

បទ​ចោទប្រកាន់​នេះ​ត្រូវ​បាន​គេ​កត់សម្គាល់​ឃើញ​ថា​គឺ​ដូច​ទៅ​នឹង​អ្វី​ដែល​លោក​នាយក​រដ្ឋមន្ត្រី ហ៊ុន សែន បាន​ថ្លែង​ជា​បន្តបន្ទាប់​ចាប់​តាំងពី​មាន​ការ​ចាប់​ខ្លួន​លោក កឹម សុខា នៅ​គេហដ្ឋាន​របស់​លោក​ក្នុង​ខណ្ឌ​ទួលគោក​កាលពី​យប់​រំលង​អធ្រាត្រ​ឈាន​ចូល​ថ្ងៃ​ទី​ ៣ ខែ​កញ្ញា​ឆ្នាំ​ ២០១៧ មក​។

លោក​ លី សុផាណា ​បាន​ថ្លែង​ថា​៖ «​បន្ទាប់ពី​បាន​ពិនិត្យ​សំណុំ​រឿង​រួម​ទាំង​ឆ្លងកាត់​ការ​ស្រាវជ្រាវ​ស៊ើបអង្កេត​ដោយ​បាន​ពិនិត្យ​ភ័ស្តុតាង និង​ផ្ទៀងផ្ទាត់​ចម្លើយ​ជនសង្ស័យ​រួច​មក​ព្រម​ទាំង​យល់​ឃើញ​ថា​មាន​មូលដ្ឋាន​គ្រប់គ្រាន់​ឲ្យ​តំណាង​អយ្យការ​អម​សាលា​ដំបូង​រាជធានី​ភ្នំពេញ​ធ្វើការ​ចោទប្រកាន់​ដោយ​បើក​ការ​ស៊ើបសួរ​លើ​ឈ្មោះ​ កឹម សុខា ពី​បទ ​«​សន្ទិដ្ឋិភាព​ជាមួយ​បរទេស​» តាម​បញ្ញត្តិ​មាត្រា ៤៤៣ នៃ​ក្រម​ព្រហ្មទណ្ឌ​ព្រះរាជាណាចក្រ​កម្ពុជា​…​ហើយ​បញ្ជូន​ទៅ​ចៅក្រម​ស៊ើបសួរ​នៃ​សាលា​ដំបូង​រាជធានី​ភ្នំពេញ​ដើម្បី​ចាត់ការ​បន្ត​តាម​នីតិវិធី​»​។

យោង​តាម​ក្រម​ព្រហ្មទណ្ឌ​បទ​ «​សន្ទិដ្ឋិភាព​ជាមួយ​បរទេស​» ​គឺជា​អំពើ​ត្រូវរ៉ូវ​គ្នា​ដោយ​សម្ងាត់​ជាមួយ​រដ្ឋ​បរទេស ឬ​ភ្នាក់ងារ​បរទេស​ដើម្បី​បង្កើត​ឲ្យ​មាន​អំពើ​ប្រទូស្តរ៉ាយ ឬ​ឲ្យ​មាន​អំពើ​ឈ្លានពាន​ប្រឆាំង​នឹង​ព្រះរាជាណាចក្រ​កម្ពុជា​។

ការ​ចាប់​ខ្លួន​លោក កឹម សុខា ធ្វើ​ឡើង​ផ្អែក​លើ​អ្វី​ដែល​លោក សុខា បាន​ថ្លែង​កាលពី​ខែ​តុលា​ឆ្នាំ ២០១៣ នៅ​ប្រទេស​អូស្ត្រាលី​ពាក់ព័ន្ធ​នឹង​ការ​តស៊ូ​របស់​លោក ដើម្បី​ឆ្ពោះ​ទៅ​រក​ការ​ប្តូរ​មេដឹកនាំ​នៅ​ប្រទេស​កម្ពុជា​ហើយ​សម្តី​របស់​លោក​ត្រូវ​បាន​បណ្តាញ​ផ្សព្វផ្សាយ CBN ធ្វើការ​ផ្សព្វផ្សាយ​តាម​អនឡាញ​។ ក្រុម​អ្នក​ច្បាប់​ដែល​ការពារ​លោក កឹម សុខា អះអាង​ថា​ការ​ចាប់​ខ្លួន​ទាំង​យប់​អធ្រាត្រ​នេះ​ធ្វើ​ឡើង​បំពាន​លើ​នីតិវិធី​នៃ​ក្រម​ព្រហ្មទណ្ឌ​។

ក៏​ប៉ុន្តែ​លោក លី សុផាណា បាន​និយាយ​ក្នុង​សេចក្តី​ថ្លែងការណ៍​របស់​ខ្លួន​កាលពី​ម្សិលមិញ​ថា​ការ​ចាប់​ខ្លួន​នេះ​ធ្វើ​ឡើង​ត្រឹមត្រូវ​តាម​នីតិវិធី​ដោយ​លោក​ លី សុផាណា ចាត់​ទុក​អំពើ​របស់​លោក​ កឹម សុខា ថា​ជា​បទល្មើស​ជាក់ស្តែង​។

សេចក្តី​ថ្លែងការណ៍​របស់​អយ្យការ​អម​សាលា​ដំបូង​រាជធានី​ភ្នំពេញ​សរសេរ​ថា​៖ «​សកម្មភាព​ឃុបឃិត​ជាមួយ​បរទេស​ក្បត់​កម្ពុជា​នេះ​កើត​មាន​តាំង​ពី​ឆ្នាំ​ ១៩៩៣ ហើយ​ផែនការ​នេះ​បន្ត​អនុវត្ត​ជា​ជំហានៗ​រហូត​មក​ដល់​បច្ចុប្បន្ន​នេះ​។ ការ​ធ្វើ​សកម្មភាព​បន្ត​មក​ដល់​ពេល​នេះ​គឺ​កំណត់​បាន​ជា​ស្ថានភាព​នៃ​បទល្មើស​ជាក់ស្តែង​ដោយ​យោង​តាម​ក្រមនីតិវិធី​ព្រហ្មទណ្ឌ​ព្រះរាជាណាចក្រ​កម្ពុជា​។ ក្នុង​ន័យ​នេះ​ការ​ចាប់​ខ្លួន​ឈ្មោះ កឹម សុខា ត្រូវ​បាន​ធ្វើ​ឡើង​ស្រប​តាម​ក្រម​នីតិវិធី​…»​។

គិត​ត្រឹម​ល្ងាច​ម្សិលមិញ​មិន​ទាន់​មាន​ព័ត៌មាន​ពី​ការ​សម្រេច​របស់​ចៅក្រម​ស៊ើបសួរ​លើ​ករណី​នេះ​ទេ​។ ប៉ុន្តែ​ព្រះរាជអាជ្ញា​បាន​បញ្ជូន​ករណី​លោក កឹម សុខា ទៅ​ដល់​រដ្ឋសភា​ហើយ​កាលពី​រសៀល​ម្សិលមិញ​ដើម្បី​ស្នើសុំ​ដក​អភ័យ​ឯកសិទ្ធិ​។

ទោះ​យ៉ាង​ណា​លោក ឡេង ប៉េងឡុង អ្នក​នាំ​ពាក្យ​រដ្ឋសភា​បាន​ឲ្យ​ដឹង​ថា​រដ្ឋសភា​មិន​ទាន់​សម្រេច​ថា តើ​នឹង​បើក​អង្គប្រជុំ​នៅ​ពេល​ណា​ទេ​ចំពោះ​ករណី​នេះ​។

លោក​ថ្លែង​ថា​៖ «​យើង​នឹង​កោះប្រជុំ​គណៈអចិន្រៃ្តយ៍​ដើម្បី​ពិនិត្យ​ឲ្យ​បាន​ឆាប់​បំផុត​។ យើង​ធ្វើ​តាម​ច្បាប់​ព្រោះ​នៅ​ក្នុង​ការ​ចោទប្រកាន់​របស់​ព្រះរាជអាជ្ញា ឬ​ការ​ចាប់​ខ្លួន​របស់​ប៉ូលិស​គេ​ចាប់​ហ្នឹង​ចោទប្រកាន់​ពី​បទល្មើស​ជាក់ស្តែង​។ បទល្មើស​ជាក់ស្តែង​អត់​មាន​កន្លែង​ណា​តម្រូវ​ឲ្យ​ដក​អភ័យ​ឯកសិទ្ធិ​អី​ទេ​។ បញ្ហា​ដែល​ត្រូវ​ដោះស្រាយ​នោះ​គឺ​ការ​ចោទប្រកាន់ និង​បើ​សភា​ចង់​ឲ្យ​តុលា​ការ​ផ្អាក​ការ​ចោទប្រកាន់​សភា​ត្រូវ​បោះឆ្នោត​ឲ្យ​សមាជិក​បញ្ចេញ​មតិ ៣ ភាគ​ ៤ ថា​បើ​សុំ​ផ្អាក​ការ​ចោទប្រកាន់​អាហ្នឹង​តុលាការ​ត្រូវ​តែ​ផ្អាក​។ បើ​មិន​បាន ៣ ​ភាគ​ ៤ ​ទេ តុលាការ​ត្រូវ​បន្ត​នីតិវិធី​តទៅ​ទៀត​ដោយ​ស្វ័យប្រវត្តិ​»​។

ស្រប​ពេល​ជាមួយ​គ្នា​នេះ​ដែរ​អាខោន​ហ្វេសប៊ុក សីហា ​ដែល​តែងតែ​យាយី​មន្ត្រី​គណបក្ស​សង្គ្រោះ​ជាតិ​បាន​បង្ហោះ​សារ​មួយ​ដោយ​ភ្ជាប់​មន្ត្រី​បក្ស​ប្រឆាំង ៤ ​រូប​ទៅ​នឹង​សំណុំ​រឿង​លោក កឹម សុខា ព្រម​ទាំង​ភ្ជាប់​កូនស្រី​ទាំង ២ រូប​របស់​លោក កឹម សុខា គឺ កឹម មនោវិទ្យា ​និង កឹម សាម៉ាធីតា ទៅ​នឹង​ភ្នាក់ងារ CIA របស់​អាមេរិក​។

ហ្វេសប៊ុក សី ហា បាន​បង្ហាញ​ឈ្មោះ​មន្ត្រី​គណបក្ស​សង្គ្រោះ​ជាតិ​ទាំង​ ៤ ​រូប​មាន​លោក ប៉ុល ហំម លោក យ៉ែម បុញ្ញាឬទ្ធិ លោក អ៊ូ ចាន់ឫទ្ធិ និង​លោក សុន ឆៃ ដែល​មន្ត្រី​ទាំង​នេះ​ធ្លាប់​បាន​ធ្វើ​ទស្សនកិច្ច​ទៅ​ជួប​សហគមន៍​ខ្មែរ​នៅ​ក្រៅ​ប្រទេស​ ឬ​ធ្លាប់​បម្រើការ​ជាមួយ​លោក សុខា កាលពី​នៅ​គណបក្ស​លោកតា សឺន សាន​។

ភ្នំពេញ​ប៉ុស្តិ៍​មិន​អាច​ទាក់ទង​មន្ត្រី​ដែល​មាន​ឈ្មោះ​ខាង​លើ​បាន​ទេ​កាលពី​ម្សិលមិញ​ដោយសារ​ភាគច្រើន​មិន​មាន​វត្តមាន​នៅ​ក្នុង​ប្រទេស​។ ប៉ុន្តែ​កូនស្រី​ទាំង​ពីរ​របស់​លោក កឹម សុខា និយាយ​ថា​ពួកគាត់​មាន​ការ​ព្រួយបារម្ភ​ចំពោះ​សុវត្ថិភាព​ផ្ទាល់​ខ្លួន​ក៏​ដូចជា​អនាគត​របស់​គណបក្ស​សង្គ្រោះ​ជាតិ​។ ទាំង​ ២ ​នាក់​បងប្អូន​និយាយ​ថា ពួកគាត់​មិន​អាច​ប្រាប់​ពី​ទីតាំង​ដែល​ខ្លួន​កំពុង​ស្ថិត​នៅ​បាន​ទេ​។

កញ្ញា កឹម មនោវិទ្យា បាន​ថ្លែង​តាម​ប្រព័ន្ធ​បញ្ជូន​សារ​ថា​៖ «​ពួកគេ​បាន​បញ្ចេញ​ឈ្មោះ​មន្ត្រី​ជាន់​ខ្ពស់​គណបក្ស​សង្គ្រោះជាតិ ប្អូនស្រី​ខ្ញុំ … ដែល​គេ​រក​ចាប់​ខ្លួន​។ យើង​បារម្ភ​ថា តើ​គណបក្ស​សង្គ្រោះ​ជាតិ​អាច​បន្ត​ដំណើរការ​បាន​យូរ​ប៉ុន​ណា​ទៀត​នៅ​ពេល​ដែល​មន្ត្រី​ដែល​កាន់​តំណែង​ដឹកនាំ​គណបក្ស​បាន​ដឹង​ពី​ជោគវាសនា​របស់​ខ្លួន​រួចស្រេច​ហើយ​នោះ​។ ពួកគេ​នឹង​ប្រើប្រាស់​តុលាការ​ដើម្បី​វាយប្រហារ​លើ​ថ្នាក់ដឹកនាំ​គណបក្ស​សង្គ្រោះ​ជាតិ​រហូត​ដល់​យើង​អស់​អ្នក​ដឹកនាំ​បក្ស​»​។

លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​បាន​ថ្លែង​ថា​ការ​សម្រេច​ថា​តើ​មន្ត្រី​ទាំង​នេះ​មាន​ជាប់​ពាក់ព័ន្ធ​ ឬ​ត្រូវ​ចាប់​ខ្លួន​យ៉ាង​ណា​នោះ​អាស្រ័យ​លើ​ការ​ស៊ើបអង្កេត​របស់​តុលាការ ប៉ុន្តែ​លោក​ថា​ជា​នីតិវិធី​អ្នក​ដែល​ពាក់ព័ន្ធ​ក៏​ត្រូវ​ជាប់​ក្នុង​សំណុំ​រឿង​ដូច​គ្នា​។

គណបក្ស​សង្គ្រោះ​ជាតិ​កាលពី​ថ្ងៃ​ទី​ ៣ ខែ​កញ្ញា​នេះ​បាន​ចេញ​សេចក្តី​ថ្លែងការណ៍​ដោយ​ហៅ​ការ​ចាប់​ខ្លួន​លោក​ កឹម សុខា ថា​ដោយសារ​ហេតុផល​នយោបាយ និង​រំលោភបំពាន​ច្បាប់​រដ្ឋធម្មនុញ្ញ​។ គណបក្ស​បាន​ស្នើឲ្យ​អាជ្ញាធរ​ដោះលែង​លោក​ដោយ​ឥត​លក្ខខណ្ឌ និង​ស្នើឲ្យ​សហគមន៍​អន្តរជាតិ​ជួយ​អន្តរាគមន៍​ឲ្យ​មាន​ការ​ដោះលែង​៕

Advertisements

ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out / ផ្លាស់ប្តូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out / ផ្លាស់ប្តូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out / ផ្លាស់ប្តូរ )

Google+ photo

អ្នក​កំពុង​បញ្ចេញ​មតិ​ដោយ​ប្រើ​គណនី Google+ របស់​អ្នក​។ Log Out / ផ្លាស់ប្តូរ )

កំពុង​ភ្ជាប់​ទៅ​កាន់ %s